Հնդկաստանը սահմանների պաշտպանության համար կարող է դիմել օձերի և կոկորդիլոսների «օգնությանը». The Hindu.

Հնդկաստանի սահմանապահ ուժերը (BSF), որոնք Պակիստանի և Բանգլադեշի ուղղություններով պատասխանատու են երկրի սահմանների պաշտպանության համար, հանձնարարել են իրենց ստորաբաժանումներին ուսումնասիրել սահմանամերձ գետային շրջաններում օձերի և կոկորդիլոսների կիրառման հնարավորությունը։ Այս մասին հայտնում է «The Hindu»-ն՝ հղում անելով Սահմանային անվտանգության ուժերին:

«Ռեպտիլիաների՝ օրինակ օձերի կամ կոկորդիլոսների օգտագործման նպատակահարմարությունը գետերի երկայնքով խոցելի հատվածներում պետք է ուսումնասիրվի օպերատիվ տեսանկյունից»։

Մասնավորապես, խոսքը վերաբերում է Հնդկաստանի և Բանգլադեշի միջև այն սահմանային գոտիներին, որտեղ գետերի, ճահիճների և բարդ ռելիեֆի պատճառով անհնար է տեղադրել ավանդական արգելապատնեշներ։ Այդ տարածքներում առաջարկվում է դիտարկել ռեպտիլիաների՝ որպես բնական պատնեշի օգտագործումը։

Միաժամանակ նշվում է, որ նախաձեռնությունը գտնվում է ուսումնասիրման փուլում, քանի որ առկա են որոշակի ռիսկեր, այդ թվում՝ տեղի բնակչության համար։

Հնդկաստանի ՆԳ նախարարության տվյալներով՝ Հնդկաստան–Բանգլադեշ սահմանի ընդհանուր երկարությունը գերազանցում է 4,9 հազար կիլոմետրը։ Ավելի վաղ երկրի կառավարությունը անօրինական միգրացիան և ապօրինի գործունեությունը կանխելու նպատակով թույլատրել էր փուլային կերպով կառուցել լուսարձակներով հագեցած սահմանային պատնեշներ։ Դրանց մեծ մասն արդեն կառուցված է, սակայն որոշ հատվածներում դա հնարավոր չի եղել բարդ բնական պայմանների պատճառով։