Ալիևն ու Ռայիսին կհանդիպեն Խուդաֆերինում
Ադրբեջանի և Իրանի Իսլամական Հանրապետության նախագահներ Իլհամ Ալիևն ու Էբրահիմ Ռայիսին մտադիր են հանդիպել Խուդաֆերինի կամրջի տարածքում։ Ըստ «Դետք»-ի՝ ադրբեջանական «Baku.TV»-ին տված հարցազրույցում այս մասին հայտարարել է Ադրբեջանում Իրանի դեսպան Սեյիդ Աբբաս Մուսավին։
Իրանցի դիվանագետը հայտնել է, որ Իլհամ Ալիևի և Էբրահիմ Ռայիսիի մասնակցությամբ տեղի կունենա «Խուդաֆերին» և «Քըզ-քալասը» հիդրոէլեկտրակայանների բացման հանդիսավոր արարողությունը։
«Հուսով եմ, որ երկու երկրների էներգետիկայի նախարարները շուտով կհանդիպեն՝ նախապատրաստական աշխատանքներ իրականացնելու համար։ Երկու երկրների ղեկավարների մասնակցությամբ սահմանին տեղի կունենա «Խուդաֆերին» և «Քըզ-քալասը» հիդրոէլեկտրակայանների ու համապատասխան ամբարտակների բացման արարողությունը»,- ասել է նա։
Դեսպանը հայտնել է, որ աշխատանքները կշարունակվեն Արազի կամրջի անցակետի, ինչպես նաև Աղբենդայի կամրջի վրա գտնվող ճանապարհային և երկաթուղային գծի արագ շահագործման հանձնելու ուղղությամբ:
Հիշեցնենք, որ Արցախ-Իրան սահմանին գտնվող Խուդաֆերինի կամուրջն Ադրբեջանի վերահսկողության տակ է անցել 44-օրյա պատերազմի ընթացքում։ Մինչև պատերազմը, չնայած Ադրբեջանի բողոքի նոտաներին, Իրանի ֆինանսական միջոցներով Արաքս գետի այդ հատվածում կառուցվել էին ջրամբար և էլեկտրակայան, սակայն այդ տարածքների նկատմամբ հաստատված հայկական վերահսկողության փաստը հետ էր պահում Իրանին դրանք շահագործելու մտքից։
Պատերազմի ավարտից հետո ադրբեջանցի և իրանցի պաշտոնյաները հայտարարեցին, որ այժմ կարող են միասնաբար օգտագործել Արաքս գետով անցնող Խուդաֆերինի ջրամբարն ու էլեկտրակայանը։
Добавить комментарий