Իսրայելն ու Լիբանանը պայմանավորվել են պահպանել հրադադարի ռեժիմը
Իսրայելն ու Լիբանանը պայմանավորվել են պահպանել հրադադարի ռեժիմը՝ «Հեզբոլլահ» շարժման կողմից հարվածների լիակատար դադարեցման պայմանով, հաղորդում է ԱՄՆ Պետդեպարտամենտը՝ Վաշինգտոնի միջնորդությամբ երկու երկրների ներկայացուցիչների միջև կայացած բանակցություններից հետո։
«ԱՄՆ-ի գլխավորությամբ անցկացված բանակցությունների արդյունքում Իսրայելն ու Լիբանանը համաձայնել են հրադադարի։ Այն կախված է «Հեզբոլլահի» կողմից կրակի լիակատար դադարեցումից և «Հեզբոլլահի» բոլոր զինյալների՝ Լիտանի գետից հարավ գտնվող հատվածից դուրսբերումից», - ասվում է Պետդեպարտամենտի հայտարարության մեջ։
Նշվում է, որ կողմերը նաև պայմանավորվել են ստեղծել փորձնական գոտիներ, որտեղ վերահսկողությունն ամբողջությամբ կիրականացնեն լիբանանյան զինված ուժերը։
«Իսրայելն ու Լիբանանը հաստատել են, որ միմյանց նկատմամբ թշնամական մտադրություններ չունեն, և պարտավորվել են շարունակել ուղիղ բանակցությունները՝ վստահության ամրապնդման, բոլոր վիճելի հարցերի լուծման և երկու երկրների միջև համապարփակ համաձայնագրի վրա աշխատելու համար», - հայտարարել են ԱՄՆ արտաքին քաղաքական գերատեսչությունում։
Այնտեղ հայտնել են, որ Իսրայելն ու Լիբանանը պայմանավորվել են «վերսկսել քաղաքականության և անվտանգության հարցերի քննարկումը հունիսի 22-ից սկսվող շաբաթվա ընթացքում՝ համապարփակ համաձայնության հասնելու նպատակով»։
Միաժամանակ ԱՄՆ-ը համաձայնել է «շարունակել միջանկյալ ժամանակահատվածում նպաստել կողմերի միջև շփումների հաստատմանը»։
Ավելացնել նոր մեկնաբանություն