Լավրովն ու Արաղչին քննարկել են hակամարտության հնարավոր տարածումը դեպի Կասպից ծովի ջրային տարածք
Մարտի 23-ին, իրանական կողմի նախաձեռնությամբ, տեղի է ունեցել Ռուսաստանի Դաշնության արտաքին գործերի նախարար Սերգեյ Լավրովի հեռախոսազրույցը Իրանի Իսլամական Հանրապետության արտաքին գործերի նախարար Աբբաս Արաղչիի հետ: Այս մասին հայտնում է ՌԴ ԱԳՆ պաշտոնական էջը:
«Քննարկվել է Պարսից ծոցի գոտում տիրող իրավիճակը, որը կտրուկ վատթարացել է ԱՄՆ-ի և Իսրայելի ագրեսիայի հետևանքով։ Լավրովը մատնանշել է Իրանի միջուկային ենթակառուցվածքներին, այդ թվում՝ «Բուշեր» ԱԷԿ-ին հասցվող ամերիկա-իսրայելական հարվածների անընդունելիությունը, որոնք անթույլատրելի ռիսկեր են ստեղծում ռուսական անձնակազմի անվտանգության համար և հղի են աղետալի բնապահպանական հետևանքներով տարածաշրջանի բոլոր երկրների համար՝ առանց բացառության։
Երկուստեք մտահոգություն է հայտնվել Վաշինգտոնի և Թել Ավիվի կողմից հրահրված հակամարտության վտանգավոր տարածման վերաբերյալ դեպի Կասպից ծովի ջրային տարածք։
Ռուսական կողմից նշվել է ռազմական գործողությունների անհապաղ դադարեցման և քաղաքական կարգավորման անհրաժեշտությունը՝ հաշվի առնելով բոլոր ներգրավված կողմերի, առաջին հերթին՝ Իրանի օրինական շահերը։ Այս դիրքորոշմամբ Ռուսաստանը կառաջնորդվի նաև ՄԱԿ-ի Անվտանգության խորհրդում։
Արաղչին շնորհակալություն է հայտնել ռուսական ղեկավարությանը Իրանին ցուցաբերվող զգալի դիվանագիտական և այլ աջակցության, այդ թվում՝ հումանիտար օգնության մատակարարումների համար»,- գրված է հաղորդագրության մեջ:
Ավելացնել նոր մեկնաբանություն