ՄԱԿ-ի հանձնաժողովը Իսրայելի գործողությունները Գազայում ճանաչել է որպես ցեղասպանություն
ՄԱԿ-ի հետաքննչական հանձնաժողովը հայտարարել է, որ Իսրայելը Գազայի հատվածում ցեղասպանություն է իրականացրել պաղեստինցիների նկատմամբ։
«Արմենպրես»-ի փոխանցմամբ՝ այս մասին հաղորդում է BBC-ն՝ վկայակոչելով ՄԱԿ-ի փորձագետների նոր զեկույցը։
Ըստ զեկույցի՝ կան բավարար հիմքեր եզրակացնելու, որ 2023 թ. հոկտեմբերին պաղեստինյան ՀԱՄԱՍ շարժման դեմ պատերազմի սկզբից ի վեր Գազայի հատվածում իրականացվել են միջազգային իրավունքով սահմանված հինգ ցեղասպանական գործողություններից չորսը՝ խմբի անդամների սպանություն, նրանց լուրջ մարմնական և հոգեկան վնասվածքների պատճառում, խումբը ոչնչացնելուն ուղղված պայմանների միտումնավոր ստեղծում և ծնունդների կանխարգելում։
Զեկույցը վկայակոչում է Իսրայելի ղեկավարների հայտարարությունները և իսրայելական ուժերի գործողությունները՝ որպես ցեղասպանական մտադրության վկայություններ։
Պաղեստինի օկուպացված տարածքների հարցով անկախ միջազգային հետաքննչական հանձնաժողովը ստեղծվել է ՄԱԿ-ի Մարդու իրավունքների խորհրդի կողմից 2021 թվականին՝ միջազգային մարդասիրական իրավունքի և մարդու իրավունքների բոլոր ենթադրյալ խախտումները հետաքննելու համար։
Ցեղասպանության մասին կոնվենցիայով ցեղասպանության իրավական սահմանման համար պետք է նաև հաստատվի, որ տվյալ գործողություններն իրագործողն այդ գործողություններից որևէ մեկը կատարել է խումբն ամբողջությամբ կամ մասնակիորեն ոչնչացնելու հատուկ մտադրությամբ։Հանձնաժողովը նշում է, որ վերլուծել է Իսրայելի ղեկավարների կողմից արված հայտարարությունները և պնդում է, որ նախագահ Իցհակ Հերցոգը, վարչապետ Բենիամին Նեթանյահուն և նախկին պաշտպանության նախարար Յոավ Գալանտը «հրահրել են ցեղասպանության իրականացումը»։
Մի շարք միջազգային և իսրայելական մարդու իրավունքների կազմակերպություններ, ՄԱԿ-ի անկախ փորձագետներ և գիտնականներ նույնպես Իսրայելին մեղադրել են Գազայի հատվածում պաղեստինցիների դեմ ցեղասպանություն իրագործելու համար։
Իսրայելական հարվածներից Գազայի հատվածում գրեթե 65 000 պաղեստինցի է զոհվել։ Անկլավում սովից մահացածների թիվը գերազանցել է 400-ը։ Ռազմական գործողությունների պատճառ է դարձել 2023 թ. հոկտեմբերի 7-ին ՀԱՄԱՍ-ի հարձակումն Իսրայելի վրա, որի հետևանքով զոհվել է 1200 մարդ, շուրջ 250 մարդ՝ գերեվարվել
Ավելացնել նոր մեկնաբանություն