Սա ընտրություն է ՌԴ–ի և Թուրքիայի միջև. Ռուստամյանը` ԵՄ-ին անդամակցելու գործընթացի մասին
«Եվրոպական միությանն անդամակցելու գործընթացի մեկնարկի մասին» օրինագծով իրականում ընտրություն է դրվում Ռուսաստանի և Թուրքիայի միջև։ Այս մասին ԱԺ-ում ասաց «Հայաստան» խմբակցության պատգամավոր Արմեն Ռուստամյանը` ընդգծելով, որ ԵՄ-ին անդամակցելու գործընթացի մեկնարկն իր մեջ մի շարք խնդիրներ է պարունակում։
Նշենք, որ խորհրդարանում շարունակվում է «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագծի քննարկումը:
«Երբ դուք ասում եք՝ ԵՄ, թե Ռուսաստան ընտրություն, խաբում եք ժողովրդին, մեր անվտանգության երաշխավորը դառնում է, ոչ թե ԵՄ-ն, այլ Թուրքիան, դուք Թուրքիայի և Ռուսաստանի միջև ընտրության առաջ եք դնում ժողովրդին։ Մեր խաղաղության երաշխավորն էլ դառնալու է Թուրքիան։ Ուզում ենք համոզել ինքներս մեզ, որ այս գործընթացն օգտակար է լինելու։ Այժմ խնդիր է դրվել տարբեր կառույցների հետ աշխատանքը «և՛, և՛»-ից փոխարինել «կա՛մ, կա՛մ»-ով։ Հայաստանը շարունակում է ԵԱՏՄ և ՀԱՊԿ լիիրավ անդամ լինել»,- ասաց Արմեն Ռուստամյանը՝ նկատելով, որ դրանով ոչնչացվում է պետության կենսունակությունը։
Նրա խոսքով` ակնհայտ է, որ Հայաստանը չի կարող միաժամանակ անդամակցել իրար հետ անհամատեղելի կառույցների հետ։ Ռուստամյանը նաև նկատեց, որ իշխանություններն այդ մասով ասում են, թե երբ լինենք ԵՄ անդամ, նոր այդ խնդիրը կբերենք օրակարգ։
«ԵՄ-ին անդամակցության գործընթացը պետք է տեղի ունենա այն տրամաբանությամբ, որ Հայաստանը պատրաստ է մոտ լինել Եվրամիությանն այնքանով, ոչ միայն որքանով այդ կառույցն է դա հնարավոր համարում, այլև որքանով դա չի սպառնում Հայաստանի լինելիությանը»,- նշեց ընդդիմադիր պատգամավորը։
Նախագծով ասվում է, որ ՀՀ-ն ԵՄ-ին անդամակցելու գործընթացի մեկնարկի նախագիծն արտահայտում է հայ ժողովրդի կամքը` խնդիր դնելով Հայաստանը դարձնել անվտանգ, ապահով, զարգացած ու բարեկեցիկ երկիր։
Հիմնավորման մեջ ասվում է` ԵՄ-ին անդամակցելու գործընթացի մեկնարկի մասին օրենքի ընդունումը կնպաստի տարածաշրջանում խաղաղության կայունության հաստատմանը, մարդու իրավունքների շարունակական զարգացմանն ու պաշտպանությանը, տնտեսական անվտանգության մեխանիզմների ստեղծմանը, ժողովրդագրական անվտանգության խնդրի լուծմանը, նոր աշխատատեղերի ստեղծմանը ու կենսամակարդակի բարձրացմանը։
Ավելացնել նոր մեկնաբանություն