Սահմանադրության մեջ արդյոք մնալո՞ւ է հղումն Արցախի հիշատակումով
Այս պահին ասել չեմ կարող, որովհետև աշխատանքային խումբ է աշխատելու Սահմանադրության նոր տեքստի վրա, բայց փակ, գաղտնի պահելու մտադրություն չունենք, երբ սկսի հանձնաժողովն իր աշխատանքը, պարբերաբար լուսաբանումներ կլինեն:
Այս մասին հրավիրված մամուլի ասուլիսին հայտարարեց արդարդատության նախարար Սրբուհի Գալյանը՝ անդրադառնալով հարցին՝ Սահմանադրության մեջ արդյոք մնալո՞ւ է հղումն Արցախի հիշատակումով:
Նախարարը նշեց, որ ի վերջո, չպետք է մոռանալ, թե Սահմանադրության նոր տեքստն ում միջոցով է և ում ընտրությամբ է ընդունվելու։ «Վերջնական տեքստը երբ լինի, ժողովուրդը կամ հավանություն է տալու այդ տեքստին, կամ հավանություն չի տալու»,- ասաց նա:
Նախարարն ընդգծեց՝ այսօրվա Սահմանադրության տեքստը որևէ խոչընդոտ չի պարունակում խաղաղության գործընթացի իրականացման համար, և այդ մասին ասել է նաև Սահմանադրական դատարանը:
«Մեր դիրքորոշումը հստակ է, մենք Սահմանադրություն փոխելու խնդիր չունենք այն պատճառով կամ նրա համար, որ թվացյալ խնդիր կա այդտեղ, ո՛չ: Հիշեցնում եմ՝ Սահմանադրության փոփոխման, նոր սահմանադրություն ունենալու աշխատանքները ե՞րբ են սկսվել։ Բոլորս հիշում ենք չէ՞, երբ են սկսվել, հեղափոխությունից հետո պարբերաբար խոսվել է Սահմանադրությունը փոխելու կամ նոր Սահմանադրություն ունենալու անհրաժեշտության մասին:
Հետո, երբ տեղի ունեցան բոլորիս հայտնի իրադարձությունները, որոշակի, այսպես ասած, մտահոգություններ բարձրաձայնվեցին որոշակի շրջանակի անձանց կողմից, և այդ մտահոգություններն ամբողջովին փարատվեցին Սահմանադրական դատարանի որոշմամբ»,- ասաց նա։
Նա նշեց, որ հանձնաժողովի աշխատանքները շուտով կվերսկսվեն:
Հարցին էլ՝ կազմը հանձնաժողովի կփոփոխվի՞, նա նշեց, որ չի կարող ասել, բայց հանձնաժողովի աշխատանքներում պետք է պահպանեն նաև քաղհասարակության ներկայացուցիչների ներգրավվածությունը:
Ավելացնել նոր մեկնաբանություն