Եվրոպան պատրաստ է ստանձնել մայրցամաքում անվտանգության ապահովման պատասխանատվությունը. Մակրոն
Ֆրանսիայի նախագահ Էմանուել Մակրոնը, ամփոփելով Եվրամիության, ինչպես նաև Կանադայի, Իսլանդիայի և Նորվեգիայի ներկայացուցիչների հետ բանակցությունների արդյունքները, հայտարարել է, որ Եվրոպան պատրաստակամ է ստանձնել մայրցամաքում անվտանգության ապահովման պատասխանատվությունը։ Միաժամանակ նա ընդգծել է, որ Ուկրաինային աջակցելը մնում է առանցքային առաջնահերթություն։
«Հենց նոր երկար զրույց ունեցա Եվրամիության, ինչպես նաև Կանադայից, Իսլանդիայից և Նորվեգիայից գործընկերների հետ։ Ֆրանսիայի և նրա գործընկերների դիրքորոշումը հստակ է և միասնական. ցանկանում ենք, որ Ուկրաինայում լինի կայուն և ամուր խաղաղություն։
Մենք կանգնած ենք Ուկրաինայի կողքին և կստանձնենք բոլոր պարտականությունները՝ ապահովելու խաղաղությունն ու անվտանգությունը Եվրոպայում։ Սա Ֆրանսիայի հիմնարար շահն է, և ես դրա երաշխավորն եմ։ Մենք կիսում ենք նպատակը, որը նաև նախագահ Դոնալդ Թրամփի նպատակն է, վերջ դնելու Ռուսաստանի սկսած և գրեթե երեք տարի շարունակվող ագրեսիվ պատերազմին։ Մեր ջանքերը հանուն խաղաղության կշարունակվեն մեր շահերից ելնելով՝ հետևյալ սկզբունքների համաձայն՝ Ուկրաինան պետք է մնա դաշնակից, և նրա իրավունքները պետք է հարգվեն, խաղաղությունը պետք է լինի տևական և ուղեկցվի ամուր ու վստահելի երաշխիքներով, պետք է հաշվի առնել եվրոպացիների անվտանգության մտահոգությունները։
Մենք համոզված ենք, որ անհրաժեշտ է մեծացնել մեր պաշտպանության և անվտանգության ծախսերն ու կարողությունները Եվրոպայի և յուրաքանչյուր առանձին երկրի համար: Որոշումները կկայացվեն առաջիկա օրերին և շաբաթներին»,- X-ում գրել է Ֆրանսիայի նախագահը։
Ավելացնել նոր մեկնաբանություն