Ինչում է մեղադրվում Ռուբեն Վարդանյանը. դատարանը հնչեցրել է մեղադրական ակտը

«Baku TV»-ն ռեպորտաժ է պատրաստել փետրվարի 13-ին կայացած՝ Ռուբեն Վարդանյանի հերթական կեղծ դատավարության և նրան ներկայացվող մեղադրանքների մասին:

 «Փետրվարի 13-ին շարունակվել է Ռուբեն Վարդանյանի քրեական դատավարության գործով նիստը, որը մեղադրվում է պատերազմի օրենքները և սովորույթները խախտելու, ահաբեկչության, ահաբեկչության ֆինանսավորման և Ադրբեջանի քրեական օրենսգրքի այլ հոդվածների մեջ: Նիստն անցել է Բաքվի դատական համալիրում Բաքվի զինվորական դատարանի դատավոր Զեյնալ Աղաևի նախագահությամբ: 

Ներկա են եղել տուժողները, նրանց իրավահաջորդները և ներկայացուցիչները, պետական մեղադրանքը ներկայացնող դատախազներ և Ադրբեջանի նախարարների կաբինետի ղեկավար Ռուֆաթ Մամեդովը: 

Նիստի սկզբում Ռուբեն Վարդանյանը և նրա փաստաբան Ավրաամ Բերմանը խնդրել են պայմաններ ստեղծել փակ հանդիպման համար, դատարանը բավարարել է նրանց խնդրանքը, ընդհատել նիստը փակ հանդիպման համար: Հանդիպումից հետո Վարդանյանը հայտարարել է, որ հրաժարվում Բաքվի կողմից նշանակված պաշտպան Ազեր Մահարրամովից, և այժմ նրան կպաշտպանի պայմանագրային փաստաբան Ավրաամ Բերմանը: 

Մեղադրող կողմը և տուժողների ներկայացուցիչը չեն առարկել միջնորդության դեմ: Դատարանը խորհրդակցել է տեղում և բավարարել միջնորդությունը: 

Այնուհետև դատը շարունակվել է՝ հրապարակելով մեղադրական ակտը: Գլխավոր դատախազության պետական մեղադրանքների աջակցության վարչության պետ Նասիր Բայրամովը հնչեցրել է մեղադրանքը: 

Ըստ մեղադրանքի՝ Ռուբեն Վարդանյանը 2022 թ. սեպտեմբերին անօրինական հատել է Ադրբեջանի պետական սահմանը Հայաստանի տարածքից դեպի Լաչինի շրջանի ուղղությամբ և հաստատվել Ադրբեջանի Հանրապետության Ղարաբաղի տնտեսական շրջանում, որտեղ ժամանակավորապես տեղակայված էին ռուս խաղաղապահները: Նա մարդասիրական նպատակների անվան ներքո դրամական միջոցներ է հավաքել իրեն և տարբեր երկրների քաղաքացիներին պատկանող մի շարք կազմակերպություններից «Ավրորա» հիմնադրամի միջոցով, որի համահիմնադիրն է, ինչպես նաև «Մենք ենք, մեր սարերը» կազմակերպության, և բարեգործական ակցիաների միջոցով այդ դրամական միջոցներով ֆինանսավորել ու սպառազինություն է մատակարարել անօրինական զինված կազմավորումներին ու խմբերին, որոնք արգելված են Ադրբեջանի օրենսդրությամբ: 

Նա անօրինական կերպով ձեռք է բերել և Ադրբեջան (նկատի ունի Արցախի տարածքը - խմբ.) տեղափոխել զենք ու ռազմական տեխնիկա, պահել դրանք հատուկ ռազմական պահեստներում: Բացի դրանից՝ նա ամենամսյա գումարներ է վճարել այսպես կոչված տեղական ինքնապաշտպանական ստորաբաժանումներին՝ արգելված Ադրբեջանի օրենսդրությամբ, ինչպես նաև այլ զինված ջոկատների՝ բաղկացած հիմնականում պրոֆեսիոնալ զինվորականներից: 

Վարդանյանը պայմանավորվել է ՈՄԱ ահաբեկչական խմբավորման հիմնադիր Վլադիմիր Վարտանովի հետ և դրամական միջոցներ հատկացրել նրա խմբավորման հրահանգիչների վերապատրաստման համար՝ Ադրբեջանի քաղաքացիների դեմ ահաբեկչական գործողություններ իրականացնելու նպատակով: 

Նա նաև պայմանավորվել է Ռուսաստանի Դաշնության տարածքում գործող «Aqua» ընկերության պատասխանատու անձանց հետ՝ համատեղ ձեռնարկության ստեղծման, կառավարվող զենիթային հրթիռների և համալիրների, թիրախների հայտնաբերման կայանքների, մարտկոցների, ռադիոհաղորդիչների և այլ սարքավորումների զանգվածային արտադրության վերաբերյալ՝ Ադրբեջանի օկուպացված սուվերեն տարածքների քաղաքացիական և ռազմական օբյեկտների դեմ օգտագործելու նպատակով:

 Բացի դրանից՝ Վարդանյանը բանակցություններ է վարել և համապատասխան հանձնարարություններ տվել ուղղաթիռային տեսակի ԱԹՍ-ների ձեռքբերման համար, որպեսզի դրանք օգտագործվեն անօրինական զինված խմբավորումների կողմից Ադրբեջանի օկուպացված տարածքներում, դրանց արտադրման գործարանի կառուցման, ռադիոէլեկտրոնային պատերազմի սարքավորումների ձեռքբերման և անօրինական զինված խմբավորումներին դրանց մատակարարման վերաբերյալ, միաժամանակ նա անձնական նախաձեռնությամբ սկիզբ է դրել «Նեմեսիս-2» ահաբեկչական գործողության կազմակերպմանը՝ ուղղված օտար երկրներում Ադրբեջանի դիվանագիտական կորպուսի ներկայացուցիչների և այն քաղաքացիների դեմ, որոնք իրենց ծառայողական պարտականությունները և հասարակական պարտքն են կատարում: 

Հիշեցնենք, որ նախորդ դատավարության ժամանակ մեղադրյալի փաստաբանը, նկատի ունենալով իր կողմից ներկայացված միջնորդությունը բավարարելու մերժումը, հայտարարել է, որ գործընկերները և դատավորը շահագրգռված են մեղադրյալի հանդեպ քրեական հետապնդման մեջ, և բողոքել է դատարանի կազմի դեմ: Դատարանը անհիմն է համարել բողոքը և չի քննարկել»,- նշվում է ռեպորտաժում: