Ռուբեն Վարդանյանը նոր ուղերձ է հղել Բաքվի բանտից

Ռուբեն Վարդանյանը Բաքվի բանտից ձայնային ուղերձ է հղել:

«Համոզված եմ` բարությունը հավերժ է և անմահ, ու երբ անանուն ես անում և դիմացը ոչ մի ակնկալիք չես ունենում, այն բազմապատկվում է»,- ասել է նա՝ իր կյանքից մի դրվագ պատմելով:

Նա պատմել է 39 տարի առաջ Ադրբեջանում տեղի ունեցած մի դրվագ, երբ իրեն առաջարկել են 50 ռուբլի կաշառքի դիմաց Ադրբեջանից Հայաստան տեղափոխվել: Վարդանյանի խոսքով՝ ինքն ընդամենը 23 ռուբլի ուներ, իսկ պակասող 27 ռուբլին, ի զարմանս իրեն, հավաքել ու տվել են ծառայակիցները՝ ցանկանալով, որ Ռուբենը հայրենիքում ծառայի:

«Կուզենայի երախտագիտությունս հայտնել ինձ օգնողներին. անգամ չգիտեմ՝ ողջ են, թե ոչ։ Բայց եթե լսեն իմ պատմությունը, պիտի իմանան, որ ես միշտ հիշում եմ այդ 23 ռուբլին և նրանց անշահախնդիր քայլը: Ես դա երբեք չեմ մոռանա»,- նշել է Վարդանյանը։

«Չարն իհարկե ունի վախճան, այն վերջավոր է, այդ պատճառով էլ այդքան ագրեսիվ է և ուշադրություն է գրավում։ Ու երբ չարին պատասխանում ես չարով, այն ավելի է ահագնանում և ուժեղանում։

Բայց հիշե՛ք. եթե բարությունը, լույսը, սերը ավելի քիչ լինեին, քան չարը, աշխարհը վաղուց չէր լինի։ Պարզապես այն, ինչպես օդը, աննկատ է, և մենք հաճախ այն պարզապես ընկալում ենք որպես ինքնըստինքյան ենթադրվող մի բան։

Մենք գալիս ենք աշխարհ մերկ և հեռանում ենք մերկ՝ ոչինչ չտանելով մեզ հետ։ Նույնիսկ փարավոններին չի հաջողվել խուսափել դրանից։ Ներե՛ք, ինչպես մենք ուզում ենք, որ մեզ ներեն, երբ մենք ինչ-որ բան սխալ ենք անում: Ուրիշների համար պատիժ մի՛ պահանջեք, իսկ ձեզ համար ներում խնդրեք։ Վարվեք ուրիշների հետ այնպես, ինչպես դուք կցանկանայիք, որ վարվեին ձեզ հետ. սա ոսկե կանոն է։ Արարեք բարիք և երջանիկ եղեք։ Խաղաղություն մեզ բոլորիս։ Սիրում եմ ձեզ բոլորիդ»,- ասել է նա։