Սահմանին հնչող կրակոցներն անհասցե են, այս պահին կուտակումներ չկան, մեր ԶՈՒ-ն կատարում է իր աշխատանքը. Պաշտպանության փոխնախարար
Այս պահին հարաբերականորեն կայուն է իրադրությունը, այդ ձեր վկայակոչած կրակոցները, որոնք երբեմն տեղի են ունենում, դրանք ոչ նշանառու, անհասցե կրակոցներ են, կարող եմ ասել՝ սակավաթիվ: Այս մասին ԱԺ-ում լրագրողների հետ զրույցում ասաց պաշտպանության փոխնախարար Արման Սարգսյանը՝ անդրադառնալով ադրբեջանական կողմի հայտարարություններին և լուրերին, թե կուտակումներ կան սահմանին:
«Մեր լրատվական ծառայության կողմից տրամադրված տեղեկության միջև որևէ հակասություն չկա։ Այս պահին կուտակումներ չկան: Երբ պաշտոնական տեղեկատվությունը ձեզ համար արժանահավատ չէ, իսկ դուք հավատալու եք տեսանյութերին, ապա կարծում եմ՝ ինձանից չպետք է հարցնեք»,- ասաց նա
Դիտարկմանը՝ բնակիչներն ասում են՝ ավելի ինտենսիվացել ու ավելի շատացել են կրակոցները և աշխարհագրությունն է ընդլայնվել, Սարգսյանն ասաց. «Զինված ուժերն իրենց լիազորությունների և պարտականությունների շրջանակներում, բնականաբար, կատարում են իրենց աշխատանքը և առաջնահերթ խնդիրն անվտանգության ապահովումն է այս պահին, ես նորից ցանկանում եմ կրկնել, որ առաջնագծում հարաբերականորեն կայուն իրավիճակ է և որևէ խնդիր ծագելու պարագայում մենք անմիջապես տեղեկատվություն կտրամադրենք»:
Ավելացնել նոր մեկնաբանություն